Vushtrria

Një prej segmenteve të rëndësishëm të administrimit të pushtetit lokal pa dyshim se është transparenca dhe ofrimi i informacioneve të nevojshme qytetarëve dhe gjithë institucioneve që kanë të bëjnë me administratën lokale. Prandaj duke u nisur nga këto parime si dhe duke përdorur mjetet më bashkëkohore të komunikimit, komunikimi i Komunës së Vushtrrisë në raport me qytetarët por edhe me institucionet po hynë në një fazë të re. Duke qenë koherent me trendët më bashkëkohore të komunikimit, me qëllim që qytetarit ti ofrohen sa më shumë informata, në këtë faqe do të gjeni dokumente dhe informacione të shumta për punën e Kuvendit Komunal dhe organeve të tij.

Në faqen zyrtare të Komunës së Vushtrrisë mund t’i gjeni të dhënat e përgjithshme për Komunën e Vushtrrisë. Duke hyrë nëpër menytë e caktuara, ju mund të njiheni më mirë me historikun, profilin dhe të dhëna tjera të rëndësishme për Komunën e Vushtrrisë, popullsinë, vendbanimet, organizimin, strukturën dhe funksionet e organeve të pushtetit lokal. Do t'i gjeni edhe deklaratat, vendimet dhe rregulloret e rëndësishme të miratuara nga Kuvendi Komunal, tarifat për shërbimet ndaj qytetarëve etj. Pastaj informacione mbi shërbimet që ofron administrata komunale për qytetarët, progresin e deritashëm dhe prioritet për të ardhmen, projektet që presin donacione e të tjera.

Në këtë faqe mund të shkarkoni nga shtëpia juaj edhe formularin për punësim në shërbimin civil të Komunës. Keni mundësinë ti shmangeni radhëve të gjata të pritjes dhe normalisht edhe kurseni kohë. Të gjitha vërejtjet dhe sugjerimet për faqen tonë si dhe për punën e organeve komunale, janë të mirëseardhura. Na shkruani, presim bashkëpunim me ju !

***Dokumente të rëndësishme***

Plani i veprimit 2008 për Implementimin e Partneritetit Evropian për Kosovën

Profili rural i Komunës së Vushtrrisë

Plani i veprimit për transparencën komunale

***Lajme dhe njoftime***

Komisioni Evropian financon ndërtimin e QKMF-së në Vushtrri

Me financim të Komisionit Evropian në qytetin e Vushtrrisë do të bëhet ndërtimi i objektit të Qendrës Kryesore të Mjekësisë Familjare. Kryetari i komunës së Vushtrrisë, Bajram Mulaku të enjten ka nënshkruar një marrëveshje për implementimin e këtij projekti.

Këtë investim nga KE i cili është ndër më të mëdhatë në mjekësinë familjare në Vushtrri, kryetari i komunës Bajram Mulaku e ka vlerësuar shumë të rëndësishme jo vetëm për faktin se do të bëjë krijimin e hapësirës së nevojshme për QKMF-në, por do të krijoj hapësirë edhe për spitalin e qytetit ngase do të bëhet lirimi i një pjese të objekteve ku tani kryhen shumë shërbime të mjekësisë familjare.

Drejtoresha e Shëndetësisë në administratën lokale, ka bërë të ditur se për këtë projekt,Kuvendi komunal ka ndarë 0.43 ha në hapësirën tek ish reparti i armirimit të Ndërmarrjes ndërtimore “Kosova”.

Postuar më 26.06.2009

Ledri Kurti dhe Mimoza Sali ndanë çmimin e parë te TPSH

Me shumë sukses është përmbyll manifestimi kryesor kulturor që i jap identitet qytetit të Vushtrrisë “Takimet e Poeteshave Shqiptare”. Juria në përbërje Abdullah Konushevci, Xhevahire Izmaku dhe Bedri Tahiri çmimi i parë ua ka ndarë poeteve Ledri Kurti nga Shkodra me poezinë “Kërkoj shpirtin për të nesërmen” dhe poetes me prejardhje çame që jeton në Itali Mimoza Sali me poezinë “Simfonia e gruas së dashuruar”. Fituese e çmimit të dytë janë poetet Aida Rexhepi nga Prizreni me poezinë “Mbledhësi i kanaqeve” dhe poetes së lindur në Korçë e që jeton në Tiranë Kozeta Zavalani me poezinë “Luledelet e vendlindjes”, ndërkaq çmimi i tretë i takoi poeteve Meri Lalaj nga Pogradeci me poezinë “Zemrat rrethuar me mure” dhe poetes nga Kukësi Marjela Manga me poezinë “Shpirti yt pezull”.

Përveç çmimeve tradicionale, në këtë manifestim Drejtoria komunale e arsimit ka ndarë edhe dy çmime speciale, poetes dhe publicistës Etleva Tafa nga Tirana dhe poetes Merrushe Gjoshaj – Zogaj nga Fushë Kosova. Kryetari i jurisë deklaron se këtë vit ka prurje të reja me vlera të hetueshme artistike që e pasurojnë krijimtarinë poetike jo vetëm të poeteve tona por edhe të poezisë sonë në përgjithësi.

Në ditën e dytë të manifestimit letrar është mbajtur edhe tribunë letrare lidhur për krijimtarinë letrare dhe jetën e poetit tonë të madh Lasgush Pogradeci në 110 vjetorin e lindjes. Me kumtesat e tyre janë paraqitur poetja dhe publicistja Meri Lalaj e cila ka qenë mike e poetit, shkrimtari Petrit Palushi dhe Lirije Ferizi nga Vushtrria.

Postuar më 18.05.2009

Komuna mbjell 1870 fidanë në qytetet

Në qytetin e Vushtrrisë ka përfunduar mbjellja e 1870 fidaneve në kuadër të një projekti të Komunës për rritjen e hapësirave të gjelbra. Duke pranuar se në Vushtrri po mungon hapësira e gjelbër, kryetari i Komunës Bajram Mulaku është shprehur se rritja e gjelbërimit në qytet ishte njëri prej pesë objektivave strategjike të programit të tij si kryetar komune. Bashkë me projektet e investimeve kapitale që tashmë kanë filluar si rregullimi i shtratit të lumit “Tërrstenë”, zgjerimi i rrugës “Dëshmorët e Kombit” dhe ndërtimit i Urës mbi lumin “Tërrstenë” në këtë rrugë, ai shpreson se me projektin e mbjelljes së fidanëve do të ndryshoj pamja e qytetit të Vushtrrisë. Përveç rrugëve, parqeve dhe shesheve të vogla mbjellja e fidanëve është bërë edhe në hapësirat rreth bregut afër lumit “Sitnicë” nga pjesa e qytetit, ku komuna ka në plan krijimin e një shëtitoreje.

Për këtë projekt të gjelbërimit komuna ka investuar mbi 90 mijë Euro. Ndërkaq përveç këtij projekti të financuar nga Komuna, në kuadër të iniciativës së Qeverisë së Kosovës “Një qytetarë një fidan”, zyrtarë të ministrisë së Bujqësisë kanë konfirmuar se në vjeshtën e këtij viti në gjithë territorin e Vushtrrisë do të mbjellën edhe 70 mijë fidanë tjerë.

Postuar më 29.04.2009

Kryeministri Thaqi promovon dy projekte të mbrojtjes së mjedisit në Vushtrri

Hashim Thaqi kryeministër i Kosovës, bashkë me kryetarin e Komunës së Vushtrrisë Bajram Mulaku të premten në qytetin e Vushtrrisë kanë vënë gurthemelin e ndërtimin e shtratit të lumit “Tërrstenë” si dhe ka vazhduar fushatën e Qeverisë për rritjen e hapësirës së gjelbërimit “Një qytetarë një fidan” duke mbjellur një fidan në parkun pranë sheshit “Adem Jashari”. I shoqëruar nga zëvendëskryeministri Hajredin Kuqi dhe nga ministri i bujqësisë Idriz Vehapi, në këtë ceremoni në Vushtrri kryeministri Thaqi tha se rregullimi i shtratit të këtij lumi do të sanojë njërin prej ndotësve me të mëdhenj në qytetin e Vushtrrisë. Kryeministri tha se njëra nga pesë pikat strategjike të qeverisë së Republikës së Kosovës për këtë vit, është krijimi i një mjedisi më të pastër për ne, familjet tona fëmijët dhe nipërit tanë.

Kryeministri Thaqi ka përgëzuar autoritetet komunale për fillimin e projektit të ndërtimit të shtratit të lumit ”Tërrstena” dhe për angazhimet në rregullimin e infrastrukturës në të gjitha lokalitet.

Duke falënderuar për mbështetjen që qeveria po i jap Komunës së Vushtrrisë, kryetari i Komunës Bajram Mulaku qeveria komunale në partneritet me qytetarin dhe mbështetje nga qeveria e Kosovës ka arritur të përmirësoj kushtet e jetesës në shumë lokalitete. Projektin e ndërtimit të shtratit të lumit “Tërrstenë”, ai e ka vlerësuar si projektin më të madh investues në infrastrukturë e veçanërisht në mbrojtje të mjedisit në Vushtrri.

Krahas fushatës së Qeverisë së Kosovës për mbjelljen e fidanëve, duke filluar që nga fillimi i muajit prill në që qytetin e Vushtrrisë tashmë është në përfundim projekti i mbjelljes së 1870 fidanëve projekt ky i financuar Komuna e Vushtrrisë me rreth 90 500 €.

Postuar më 25.04.2009

Më përkrahje të OSBE-së Komuna bëhet me bibliotekë ligjore në shërbim të qytetarëve

Përmes një projekti i cili ka filluar së zbatuari të martën, nëbashkëpunim me OSBE-në Komuna e Vushtrrisë ka bërë hapjen publike të bibliotekës ligjore e cila do të jetë në shërbim të qytetarëve. Në ceremoninë e hapjes së kësaj biblioteke ku merrnin pjesë drejtues të Komunës së Vushtrrisë dhe përfaqësuesve të OSBE-së dhe shoqërisë civile u vlerësua se biblioteka ligjore lehtëson punën e organeve komunale në zbatimin e legjislacionit të ri për vetëqeverisjen lokale.

Zëvendës drejtori i zyrës regjionale të OSBE-së Francis Karlier me rastin e hapjes së kësaj biblioteke tha se koncepti i komunave demokratike përmban shkallen e transparencës dhe qasjes së qytetarëve në dokumentet zyrtare. ”E dini që në konceptet demokratike, komunat kanë të shprehur elementin e transparencës dhe qasja e popullatës në dokumentet ligjore”, është shprehur Karlier. Ai ka folur për bashkëpunimin e mirë me komunën në implementimin e këtij projekti ku fillimisht tha se janë disa libra interesante dhe mjete të teknologjisë informative që do t’u shërbejnë qytetarëve.

Ndërkaq kryesuesi i Kuvendit Komunal, Ferid Idrizi implementimin e këtij projekti e vlerësoi shumë të rëndësishëm për rritjen e transparencës në komunën e Vushtrrisë, për të cilin tha se është edhe synim i administratës lokale. “Do të ndjehemi më mirë edhe ne pushtetarët por edhe qytetarët me transparencën që ofron kjo zyre” theksoi Idrizi.

Postuar më 28.01.2009

Udhëheqja komunale paralajmëron investime të mëdha në Vushtrri

Drejtuesit e Komunës së Vushtrrisë, të martën në një konferencë për shtyp kanë folur për projektet e realizuara vitin që shkoi si dhe për projektet që synohen të realizohen këtë vit. Në përmbledhjen e projekteve të planifikuara për këtë vit, kryetari i komunës Bajram Mulaku thënë se Komuna ka planifikuar realizimin e 49 projekteve kryesisht në infrastrukturë.

Ndër projektet e mëdha që do realizohen këtë vit Mulaku veçoi zgjerimin e rrugës Dëshmorët e Kombit nga hyrja nga drejtimi i Prishtinës e cila rrugë do bëhet me 4 korsi, ndërtimin e urës mbi lumin Tërrstenë si dhe rregullimin e shtratit të lumit “Tërrstenë” vlera e të cilit kap shumën 1.5 milion Euro. Projekte që tashmë kanë filluar por që do të përfundojnë këtë vit, Mulaku ka theksuar përfundimin e rrugës rajonale Vushtrri-Skenderaj si dhe asfaltimin e rrugës Stanofc-Breznicë rrugë kjo e cila lidh fshatrat e komunës së Vushtrrisë me atë të Obiliqit. Në 16 projekte të asfaltimit të rrugëve të realizuara vitin e kaluar, Mulaku tha se janë asfaltuar rreth 48 kilometra rrugë. Po ashtu si investime kryesore, ai tha se janë ndërtuar 3 objekte shkollore si dhe dy tjera një objekt i madh shkollor në qytet si dhe objekti shkollor në fshatin Akrashticë janë në ndërtim e sipër dhe do përfundojnë këtë vit. Këtë vit është ndërtuar edhe qendra e mjekësisë familjare në fshatin Skromë si dhe objekti i Qendrës për punë sociale në Vushtrri.

Një përmbledhje të punës së Kuvendit Komunal, ka dhënë kryesuesi i KK-së Ferit Idrizi i cili tha se Kuvendi ka marrë 117 vendime ka nxjerr dy rregullore, një urdhëresë si dhe ka nxjerr statutin e Komunës. Ndërkaq nënkryetarja e komunës Xhevahire Izmaku si ngjarje kryesore kulturore ka paralajmëruar manifestimin “Ditët e Hasan Prishtinës” kushtuar patriotit tonë kombëtar.

Postuar më 14.01.2009

Projektet e Komunës

Statuti i Komunës

Rregulloret e Komunës

Vendimet e Komunës

Kodi i mirësjelljes

Procesverbalet

Linqe me rëndësi

Na kontaktoni

Kjo është faqja zyrtare e Kuvendit Komunal Vushtrri. Lejohet përdorimi i informacionit zyrtar që jep kjo faqe në publikime të tjera, duke cituar burimin. Linket dhe lidhjet e tjera të jashtme bëhen vetëm për referim dhe nuk tregojnë preferencën apo politikën zyrtare. Ndërhyrjet apo ndryshimet e paautorizuara të informacionit në këtë web-site, konsiderohen shkelje te ligjit dhe janë të ndëshkueshme ligjërisht.

Mbeshtetur nga OJQ

"Shoqëria për shoqërinë"