Apel

i Kuvendit të komunës së Vushtrrisë në seancat e dt. 09 03 dhe 30.03.2006 lidhur me privatizimin e parcelës në të cilën gjendet drejtoria e NSH. “Çyçavica” në Vushtrri

Privatizimi i ngastrës nr. 656 me sipërfaqe prej 0.17.60 hektarë në të cilën gjendet NSH “Çiçavica” e cila është në qendër të qytetit në Vushtrri është në kundërshtim me qëndrimet dhe vendimet e institucioneve të komunës së Vushtrrisë. Bazuar në faktin se kërkesat e mëhershme të arsyetuara me shkrim  të përfaqësuesve të institucioneve të komunës së Vushtrrisë drejtuar AKM-ës për përjashtim nga procesi i privatizimit të ngastrës në fjalë dhe për ndërrim të kësaj ngastre me pronën tjetër të komunës nuk janë marrë parasysh, Kuvendi i Komunës në seancën e mbajtur më 09.03.2006 ka vu në rend të ditës këtë çështje  lidhur me të cilën unanimisht ka konstatuar se rregullimi urbanistik i qytetit- sheshi i qytetit në ngastrën në fjalë është e një rëndësie të veçantë dhe në përputhshmëri me planin detal urbanistik të qytetit si dhe me vendimin e më hershëm të Kuvendit të Komunës. KK. në seancë të njëjtë njëzëri kundërshton privatizimin nga ana e AKM-së të parcelës në fjalë.

Privatizimi i kësaj ngastre kundër vendimeve të KK-së, bie ndesh  edhe me Rregulloren e UNMIK-ut nr. 2006/5 sipas së cilës pronat e ndërmarrjeve shoqërore në bazë të vendimit paraprak të PSSP mund të bartën në pronësi të Komunës nëse ajo pronë është me interes publik për Komunën dhe qytetarët e saj.

Prandaj duke pas parasysh këtë, Kuvendi Komunal edhe në seancën e mbajtur me 30 03 2006 edhe njëherë apelon tek të interesuarit e mundshëm që të mos e blejnë atë pronë sepse prona në fjalë është me interes publik për Komunën dhe qytetarët e saj pasi që aty parashihet të ndërtohet sheshi i qytetit (rregullimi i fontanës, parkut etj.). Kuvendi i Komunës do të iu përmbahet vendimeve të miratuara që në atë pronë të bëhet rregullimi i sheshit të qytetit dhe nuk do të lejoj asnjë leje ndërtimi të objekteve që janë në kundërshtim me vendimin e KK-ës dhe planin urban të qytetit.

Kryetari i Kuvendit

Muharrem Shabani