Një delegacion nga Turqia qëndroi për vizitë treditore në Vushtrri

            Pas qëndrimit treditor në qytetin e Vushtrrisë, delegacioni i Komunës Mamak të qytetit të Ankarasë të Turqisë me të cilën është binjakëzuar Komuna e Vushtrrisë, të hënën para largimit nga Kosova, së bashku me drejtuesit komunal kanë dhënë një konferencë për shtyp në Vushtrri ku kanë folur për mundësitë e bashkëpunimit midis këtyre dy komunave.

Delegacioni i kryesuar nga nënkryetari i Kuvendit të Komunës Mamak z. Talip Altug me bashkëpunëtorë dhe deputeti i Parlamentit të Ankarasë Nidaver Akbayir si dhe biznesmen dhe ekspert e përfaqësues tjerë të asaj komune, Gjatë këtyre tre ditëve pos takimeve që kanë pasur me drejtues të pushtetit lokal në Vushtrri, ata kanë vizituar edhe monumentet e kulturës në Vushtrri si “Urën e Gurit”, “Kalanë e qytetit” dhe “Hamamin”, pastaj tyrben e Sulltan Muratit në Kasriot si dhe kanë vizituar Akademinë e policisë në Vushtrri, trupat e KFOR-it në qytetin e Prizrenit dhe vizita tjera.

Nënkryetari i Kuvendit të Komunës Mamak Talip Altug si dhe parlamentari i Ankarasë Akbayir kanë deklaruar sot se për Kosovën kanë krijuar një pasqyrë të mirë dhe se veçanërisht janë njohur me shumë nevoja dhe kërkesa të Komunës së Vushtrrisë. Përfaqësuesit e delegacionit turk janë shprehur optimistë për realizimin e një bashkëpunimi në fushën e kulturës, arsimit, ndërtimit, biznesit etj. “Të gjitha këto kërkesa dhe nevoja të Vushtrrisë do ti prezantojmë në komunën e Mamakut dhe të bashkisë së Ankarasë dhe do të shqyrtohet mundësia e ndihmës dhe bashkëpunimit”, ka thënë Altug në fund të vizitës së delegacionit turk në Vushtrri.

Ndërkaq nga ana tjetër kryetari i Komunës Muharrem Shabani ka thënë që gjatë qëndrimit të miqve turq në Vushtrri këta të fundit janë njoftuar me potencialet, nevojat dhe mundësitë e bashkëpunimit të Komunës së Vushtrrisë me Komunën Mamak të qytetit të Ankarasë. Shabani nga kjo vizitë pret bashkëpunim në restaurimin e disa objekteve të kulturës në Vushtrri si dhe në fushën e ndërtimit.

Kjo është vizita e parë e delegacionit turk nga Komuna e Mamakut prej vëllazërimit të kësaj Komune me Komunën e Vushtrrisë që është bërë me 17 shkurt të këtij viti gjatë vizitës së një delegacioni të komunës së Vushtrrisë në qytetin e Ankarasë në Turqi.