Institucionet komunale janë unike që të mos shitet prona që është destinuar për ndërtimin e shkollës

                Tani kur është paralajmëruar mundësia e privatizimit të Repartit të transportit dhe të mekanizimit të ndërmarrjes ndërtimore “Kosova”, të cilën parcelë dy vite më parë Komuna e Vushtrrisë me vendim të veçantë e ka destinuar për ndërtimin e një shkolle fillore, të martën kjo çështje është shtruar në një mbledhje të përbashkët të komitetit për politikë dhe financa të KK-së dhe të Bordit të Drejtorëve të Komunës së Vushtrrisë të cilat institucione shprehen kundër ndërrimit të destinimit  të kësaj prone. Rreth kësaj çështje e cila vlerësohet të jetë në interes të qytetarëve janë bashkuar dhe kanë dalë me qëndrime unike edhe përfaqësuesit e subjekteve më të mëdha politike të përfaqësuara në Kuvend, përkundër dallimeve dhe mospajtimeve që kanë ndërmjet vete për çështje tjera. Në një konferencë shtypi të thirrur nga Komuna ku merrnin pjesë drejtuesit e institucioneve të Komunës duke përfshirë edhe anëtarët e KPF-së që janë përfaqësues të subjekteve politike pjesëmarrëse në Kuvendin Komunal, të gjithë kanë mbështetur vendimin e Kuvendit Komunal dhe kanë kërkuar nga AKM-ja që ta bëjë ndërrimin e kësaj prone me ndonjë pronë tjetër të Komunës.

                Drejtuesit e institucioneve komunale janë shprehur se nuk janë kundër procesit të privatizimit. Kryetari i Komunës Muharrem Shabani kërkon nga AKM-ja që kjo pronë të ndërrohet me ndonjë pronë tjetër dhe që ky ndërrim të bëhet nga kompani të specializuara që do ta bëjnë vlerësimin real, në mënyrë që Komuna të mund ta ndërtojë shkollën në atë pjesë e cila edhe është e destinuar për atë qëllim. Kreu i komunës thotë se për këtë çështje ka përkrahjen edhe të përfaqësueseve regjional dhe atij komunal të UNMIK-ut, përfaqësuesve të këshillit të punëtorëve dhe sindikatës së NN “Kosova”.

                Përmes kësaj konference për shtyp drejtuesit e Komunës u kanë apeluar edhe ofertuesve që të kenë parasysh vendimin e Komunës dhe të mos e blejnë atë pronë. “Apelojë tek të gjithë ofertuesit që kanë aplikuar se do të vinë në kundërshtim me vendimin e Komunës”, ka thënë ai. Ndërkaq nga ana tjetër zëvendëskryetari Shemsi Hajrizi ka shtuar se pronarët e mundshëm duhet ta kenë parasysh faktin se Komuna nuk do të lëshojë kurrfarë leje për ndërtim dhe për punë në atë pronë. Me këto qëndrime janë pajtuar edhe kryeshefi i ekzekutivit Muharrem Parduzi, dhe anëtari i KPF-së Xhemajl Abazi si dhe drejtues tjerë të institucioneve komunale. Duke rikonfirmuar vendimin e KK-së që destinon këtë pronë si interes i përgjithshëm, Muharrem Parduzi i cili është i specializuar në drejtësi, thotë se parimisht as AKM-ja e askush tjetër nuk mund që këtë parcelë ta trajtoj si lëndë të privatizimit. Ai ka thënë madje se një zonë e interesit të përgjithshëm edhe në qoftë se është pronë private ajo duhet eksproprijohet.

                Prona në fjalë është ngastra numër 921 në qytetin e Vushtrrisë e cila ka sipërfaqe prej 1.28 hektarë e 71 metra dhe se tani përveç disa makinave të cilat nuk janë në funksion nuk ka asnjë objekt tjetër ndërtimor që mund të hyjë në funksion.