Kermabo lavdëron punën që është bërë në kthimin e ashkalive

            Komandanti i KFOR-it, gjenerali Iv De Kermabo të mërkurën gjatë vizitës në lagjen e ashkalive në qytetin e Vushtrrisë ka vlerësuar lartë angazhimin e të gjithë faktorëve që kanë punuar në kthimin e këtyre familjeve të ashkalive, si Komunën e Vushtrrisë, TMK-në, SHPK-në, si dhe organizatat tjera që kanë qenë të përfshira në këtë proces. Gjatë kësaj vizite, Kermabo i shoqëruar nga kryetari i Komunës Muharrem Shabani dhe nga komandanti i Zonës së IV të TMK-së gjeneral Zymer Halimi, si dhe nga komandanti i Stacionit të policisë në Vushtrri, kapiteni Shkëlzen Xhafa, fillimisht është ndalur në Qendrën operative që TMK-ja ka vendosur në lagjen e ashkalive, ku është informuar me aktivitetin që TMK-ja po bënë në sigurimin e familjeve të ashkalive të kthyer si dhe në transportimin e familjeve të ashkalive të cilat janë duke u kthyer.

Kermabo tha se vinte nga takimi me Grupin e kontaktit ku u bë vlerësimi i punëve që po bëhen rreth standardeve, ku u tha se për çështjet e lëvizjes së lirë dhe për kthimin duhet bërë më tepër. Prandaj tha ai, kjo çka është bërë  këtu është një punë e mirë.

TMK-ja në këtë detyrë pa dyshim të re në kuadër të angazhimeve të saja, ka të angazhuar 30 pjesëtarë të ndarë në tri njësi të cilët janë duke bërë vazhdimisht sigurimin e lagjes ku janë të kthyer ashkalitë.

Kryetari i Komunës, Shabani ka vlerësuar se ky nuk do të jetë aktiviteti i vetëm në kuadër të krijimit të kushteve dhe një mjedisi të qetë për të gjithë  qytetarët e Komunës së Vushtrrisë. “Komuna e Vushtrrisë është e përkushtuar të ndërtoj raporte të mirëbesimit tek të gjithë qytetarët që pranojnë realitetin e ri të krijuar në Kosovë dhe që duan të jetojnë këtu” është shprehur ai. Për aktivitetin dhe mbështetjen e të gjithë atyre që kanë bërë të mundur kthimin e ashkalive nëpër shtëpitë e tyre, në emër të ashkalive të kthyer ka shprehur falënderimet Hamit Zymeri familja e të cilit është kthyer e para në lagjen e ashkalive.

Që nga dita e premte kur edhe janë kthyer familjet e para, deri më sot në shtëpitë e tyre në Vushtrri janë kthyer gjithsejtë 10 familje të ashkalive me gjithsejtë 36 anëtarë.  Gjatë vizitës së komandantit të KFOR-it, Kryqi i Kuq i Kosovës u ka ndarë ndihma familjeve të ashkalive të kthyer në shtëpitë e tyre në qytetin e Vushtrrisë.