Komandanti i BSHVL-së gjenerali Stoltz: Kam besim në të ardhmen e këtij vendi

            Komandanti i sapoemëruar në BSHVL të KFOR-it, gjenerali Philip Stoltz, të mërkurën është pritur nga drejtuesit e pushtetit lokal në Vushtrri, nga të cilët është informuar lidhur me angazhimet dhe problemet me të cilat përballet Komuna e Vushtrrisë. Kryetari i Komunës Muharrem Shabani i cili në këtë takim është shoqëruar edhe me drejtues të administratës lokale, ka informuar komandantin e BSHVL-së lidhur me angazhimet e Komunës në përmbushjen e standardeve dhe krijimin e kushteve për jetë më të mirë për të gjithë qytetarët e saj pa dallim etnie, si dhe për problemet e gjendjes së rëndë ekonomike e së fundi edhe me problemin e madh të furnizimit me energji elektrike.

            Ndërkaq gjenerali Philip Stoltz, i cili sapo është emëruar komandant i BSHVL-së tha se misioni i KFOR-it është të siguroj një mjedis të sigurt por edhe të besimit. Ndërkaq sa i përket çështjeve tjera si të zhvillimit ekonomik, ai tha se KFOR-i do të punoj në mbështetje të UNMIK-ut por do të përkrah  edhe projektet shumë etnike. Nga ajo që ka parë tek banorët e Kosovës, gjenerali Stoltz tha “kam besim në të ardhmen e këtij vendi”. 09 11 2005