Me përkrahje dhe mbështetje të TMK-së u kthyen pesë familjet e para të ashkalive në Vushtrri.

            Dy kamion të TMK-së kanë sjellur njerëzit dhe gjësendet e pesë familjeve të  ashkalive të cilët të premtën po zhvendoseshin nga kampi i improvizuar në ishmotelin “Vicianum”, në shtëpitë e tyre tashmë të rindërtuara në qytetin e Vushtrrisë. Pikrishtë kur u bë një vit nga largimi nga shtëpitë e tyre, dje është bërë kthimi i pesë familjeve të para të ashkalive në lagjen e tyre në qytetin e Vushtrrisë. Pjestarët e Zonës së IV të TMK-së kanë qenë ata të cilës së bashku me të kthyerit kanë shkarkuar gjësendet e këtyr familjeve të cilët kanë shprehur vullnetin për kthim në shtëpitë e tyre.

            Hamit Zymeri, kryefamiljar i njërës prej pesë familjeve të kthyera është shprehur i lumtur që po kthehej në shtëpinë e tij. Ai është shprehur se angazhimi i TMK-së në kthimin e tyre, që është bërë me kërkesë të vet ashkalive ka krijuar siguri më të madhe për ta. Derisa i ndihmuar nga anëtarët e familjes së tij dhe nga pjestarët TMK-së  po fuste gjësendet e familjes në shtëpinë e tij tashmë të renovuar nga djegia  në ngjarjet e dhunshëme të marsit të vitit të kaluar, ai u ka bërë thirrje të të gjithë të zhvendosurve që të kthehen në shtëpitë e tyre.

            Përveç pesë familjeve me gjithësjetë 26 anëtarë të kthyer në shtëpitë e tyre, nga kampi në motelin “Vicianum” nuk janë zhvendosur edhe tri familje tjera të ashkalive. Sipas burimeve të afërta me këtë proces të kthimit, ata kanë këmbngulur që të mos kthehen derisa të bëhet ndërtimi i mureve të rrethojave të shtëpive.

Në lagjen e ashkalive në qytet ku janë rindërtuar 59 shtëpi, Zona e IV e TMK-së ka vendosur një Qendër operative dhe një njësi të saj e cila është duek bërë sigurimin e kësaj lagjeje. Sipas nënkolonel Emin Musës janë 30 pjestarë të TMK-së të ndarë në tri njësi që po bëjnë sigurimin e lagjës së ashkalive që nga fillimi i këtij muaji. Me qëllim të kryerjes sa më mirë të punës që i është besuar TMK-së, kjo qendër ka lidhjen me Komandën e Zonës së IV-të, me SHPK-në dhe me Qendrën emërgjente. Në këtë angazhim të ri të TMK-së rreth këtij projekti për të cilin është pajtuar edhe KFOR-i, nënkolonel Musa thotë se TMK-ja e ka pranuar këtë detyrë për faktin se është faktori më i besueshëm për të gjthë qytetarët dhe se angazhimi i saj në këtë detyrë gjithësesi krijon një mjedis më të sigurtë në këtë lagje.

Kthimin e ashkalive në shtëpitë e tyre, Ekrem Merovci zyrtar për integrime në komunën e Vushtrrisë e ka quajtur si ngjarje të madhe për Vushtrrinë. Në fillimin e realizimit të këtij projekti, ai ka falenderuar TMK-në për kontributin e madhë që po jep në këtë drejtim. Përveç familjeve të para që tashmë u kthyen, Merovci thotë se Komuna e Vushtrrisë në bashkpunim edhe me një donatorë kanë financuar ndërtimin e mureve të rrethojave të shtëpive të ashkalive, ku më pas edhe do të bëhet kthimi i familjeve tjera të ashkalive të cilët aktualishtë janë duke jetuar në Kastriot, në Fushëkosovë, Pejë e vende tjera.