Kermabo dhe Halimi vënë gurthemelin e ndërtimit të mureve të oborreve të shtëpive të ashkalive

            Komandanti i trupave të KFOR-it, gjenerali Iv dë Kermabo të martën së bashku me komandantin e Zonës së IV të TMK-së gjeneral Zymer Halimin kanë marrë pjesë në solemnitetin me rastin e fillimit të punëve të ndërtimit të mureve të oborreve të shtëpive të ashkalive në qytetin e Vushtrrisë.

            Me rastin solemn të vënies së gurthemelit për këto ndërtime, gjenerali francez në krye të misionit të trupave të KFOR-it në Kosovë ka vlerësuar pozitivistë angazhimin që po bëhet në vazhdimësi në kthimin dhe integrimin e komunitetit shkali në Vushtrri. “Është hera e tretë që vizitoj këtë lagje dhe vazhdimisht po shoh përparime”, ka thënë komandanti Kermabo. Me këtë proces të kthimit po krijohet një besim  i cili do të jetë shumë i vlefshëm për Kosovën në përgjithësi dhe se për këtë Komuna e Vushtrrisë ka bërë një punë të mirë, ka thënë ai. Kermabo ka vlerësuar lartë sidomos shembullin e mirë të bashkëpunimit të shumë faktorëve që janë të përfshirë në këtë kthim të qëndrueshëm si TMK-në, SHPK-në dhe gjithë organizatat tjera duke përfshirë edhe organizatën zvicerane “Heks” e cila është donator i projektit të ndërtimeve të mureve rrethuese të oborreve të shtëpive të ashkalive. Në këtë solemnitet kanë marrë pjesë edhe zëvendëskryetari i KK-së Shemsi Hajrizi dhe zëvendëskryeshefi i ekzekutivit Ismet Osmani.

            Në procesin e kthimit në qytetin e Vushtrrisë janë angazhuar drejtpërdrejtë edhe Trupat e Mbrojtjes së Kosovës, të cilat kanë vendosur një kompani dhe janë duke bërë sigurimin e lagjes së ashkalive.

            Tafil, Hyseni zyrtar për minoritete në Komunën e Vushtrrisë ka bërë të ditur se deri më sot në lagjen e ashkalive janë kthyer 14 familje të ashkalive me gjithsejtë 48 anëtarë, ndërkaq që brenda dhjetë ditëve pritet kthimi edhe i 15 familjeve tjera me 59 anëtarë. Me rastin e fillimit të punëve ka marrë pjesë edhe Hamide Latifi përfaqësuese e organizatë Gratë për Gratë-Internacional e cila është implementuese e këtij projekti. Kryerjen e punëve në ndërtimin e mureve të oborreve të 14 shtëpive të ashkalive e bënë kompania MAK-Building nga Vushtrria.