Përmbyllet kthimi i ashkalive në shtëpitë e tyre në Vushtrri

            Të larguar për shkak të ngjarjeve të marsit, të mërkurën në shtëpitë e tyre tashmë të rindërtuara në qytetin e Vushtrrisë janë kthyer nëntë familje të ashkalive. Kthimin e familjeve të ashkalive në shtëpitë e tyre e kanë përshëndetur drejtuesit e Komunës së Vushtrrisë, Komandanti i BSHVL-së të KFOR-it gjenerali Philip Traqui, zëvendëskomandanti i Zonës së IV të TMK-së nënkolonel Jakup Nura si dhe drejtues të policisë në Vushtrri, të cilët kanë marrë pjesë në ceremoninë e dorëzimit të çelësave  të shtëpive.

Me rastin e kthimit të këtyre familjeve, kryetari i Komunës Muharrem Shabani ka thënë që institucionet komunale në bashkëpunim me ato qendrore do të krijojnë kushte që në shtëpitë e tyre të kthehen të gjitha ata që janë zhvendosur nga kjo komunë.  

 “Roli ynë është që ta mbështesim kthimin e të gjithë të zhvendosurve në vatrat e tyre, pavarësisht përkatësisë etnike të cilës i takojnë”, ka thënë komandanti i BSHVL-së të KFOR-it gjenerali Philip Traqui me rastin e kthimit të nëntë familjeve të ashkalive në Vushtrri.

            Për kthimin e ashkalive në emër të familjeve që u kthyen sot, Shyqyri Quni ka falënderuar të gjithë ata që mundësuan kthimin në shtëpitë e tyre. Sipas zyrtarit për komunitete Tafil Hyseni, të mërkurën janë kthyer gjithsejtë nëntë familje me 47 anëtarë. Këto familje deri më tani kanë jetuar në qytetin e Fushë-Kosovës, Kastriotit nga kampi i Plemetinit, nga qyteti i Prishtinës dhe Pejës.

            Me kthimin e sotëm të familjeve të ashkalive, përveç tri familjeve për të cilat vet shkalitë thonë se do kthehn shpejtë, është përmbyllur edhe çështja e kthimit të ashkalive në shtëpitë e tyre në qytetin e Vushtrrisë, të cilët ishin larguar që nga ngjarjet e marsit të vitit të kaluar.