Shabani dhe Gallucci takojnë serbët e Gojbulës

            Gerard Galluci përfaqësuesi regjional i UNMIK-ut i shoqëruar nga kryetari i KK-së Muharrem Shabani dhe nga Kryeshefi i ekzekutivit Muharrem Parduzi të hënën kanë zhvilluar një takim me përfaqësues dhe banorë të fshatit Gojbulë të Vushtrrisë, fshat ky i cili është i banuar me serbë. Në këtë takim kanë marrë pjesë Ekipi i OSBE-së për te drejtat e njeriut në Vushtrri si dhe drejtues të policisë kolonel Ergin Mediq zëvendëskomandant regjional i SHPK-së, dhe kapiten Abdylaziz Hoxha ushtrues detyre i komandantit të stacionit të policisë në Vushtrri. Kryetari i Komunës Muharrem Shabani për këtë takim tha se ishte një vizitë e përbashkët në fshatin Gojbulë me përfaqësuesit e komunës dhe të UNMIK-ut, të shikojmë hallet dhe problemet e qytetarëve. “Përsëris se si kryetar i Kuvendit Komunal jam i gatshëm t’u ofroj trajtim dhe shërbime plotësisht të barabarta të gjithë qytetarëve të komunës sonë pa dallim etnie”, ka thënë ai, duke shtuar se natyrisht të gjithë atyre të cilët i njohin institucionet komunale, ligjet e Kosovës, ligjet e UNMIK-ut dhe dëshirojnë të koordinojnë që të mos kemi institucione paralele dhe që të gjitha të drejtat qytetare t’i realizojnë nëpërmes institucioneve në mënyrë legale. Për këtë qëllim Shabani është shprehur për mbështetjen dhe bashkëpunimin e mirë që Komuna e Vushtrrisë ka edhe me Galluccin për të cilin tha se ka mbështetje konkrete për shumë çështje.

Lidhur me këtë takim Galluci tha se serbët shprehën shqetësimet e tyre praktike që kanë të bëjnë me sigurinë. Kreu i UNMIK-ut për regjionin e Mitrovicës ka thënë se fshatarët shprehen qëndrimin se do të qëndrojnë në këto treva, kurse nga ana ime u premtova se UNMIK-u do të bëjë çka është e mundur që tu ndihmohet. “Njerëzit e shprehën përcaktimin e tyre që të jenë pjesë e një komuniteti më të madh, një bashkësie më të madhe”, ka thënë Gallucci. Kryetari i këshillit të fshatit Gojbulë, Bratisllav Kostiq është shprehur se me drejtuesit e komunës dhe ata të UNMIK-ut ka qenë një bashkëbisedim i mirë me të cilët është biseduar rreth bashkëjetesës në mes shqiptarëve dhe serbëve si dhe për problemet e serbëve.