Poezia “Lulet e Bardha” e poetes Fatime Ahmeti është vlerësuar si poezia më e mirë e manifestimit Takimet e poeteshave shqiptare Vushtrria 2005, manifestim ky që për dy ditë rresht është mbajtur në qytetin e Vushtrrisë. Çmimin i dytë i ka takuar poezisë “Ndoshta” e poetes Dritë Maxhuni, ndërkaq çmimi i tretë i është ndarë dy poeteve, poetes Sherife Berisha Thaqi me poezinë “Kënga e zogjve”  dhe poetes “Remzije Zekolli” me poezinë “Ti dhe ulliri i Skënderbuet”. Çmimin e debutantës i është ndarë poetes Alketë Spahiu me poezinë “Mozaik Perendish”.

Vlerësimin e poezive të këtij manifestimi të organizuar nga Komuna e Vushtrrisë në bashkëpunim me Ministrinë e Kulturës dhe Lidhjes së shkrimtarëve të Kosovës, e ka bërë juria në përbërje Kadrush Radogoshi dhe Zana Piraj nga Lidhja e Shkrimtarëve të Kosovës, si dhe Nexhmi Maxhuni profesor i gjuhës dhe letërsisë në Gjimnazin “Eqrem Qabej”.

Në kumtesën e tij, profesor Rifat Ismajli  figurën e femrës e ka ndarë në figurë të saj jetësore që bënë pjesë në histori dhe atë shpirtërore që bënë pjesë në poezi. “Femra jonë sot, me vepra të dëshmuara, qoftë historike apo poetike, e ka afirmuar dhe ndriçuar qenien e saj” tha profesor Ismajli. Lidhur me vlerat e poezive pjesëmarrëse të këtij takimi këtë vit, Radogoshi tha se përveç kuantitetit janë edhe në cilësi më të mirë se vitin e kaluar.

Ndërkaq poeti Kadrush Radogoshi që në këtë manifestim ishte në cilësinë e kryetarit të jurisë, në debatin e ngritur lidhur me ndikimin e historiografisë në krijimtarinë poetike të poetëve, ka thënë që “poezia ka një mision që ta caktojë figurën e saktë në histori”.

Për këtë segment dhe çështje tjera që kanë të bëjnë me poezinë dhe manifestimin Takimet e poeteshave shqiptare i cili që nga viti 1979 mbahet në qytetin e Vushtrrisë kanë diskutuar edhe pjesëmarrës tjerë, njerëz që duan fjalën e shkruar.