Komandanti i KFOR-it qëndron për vizitë në Vushtrri

               Komandanti i KFOR-it gjenerali Gjyzepe Valoto, të premten me 25 nëntor ka qëndruar për vizitë në Komunën e Vushtrrisë ku ka takuar drejtuesit e Komunës së Vushtrrisë. “Jemi duke jetuar në një moment shumë të rëndësishëm që ka të bëjë me bisedimet për statusin final, jam këtu për të njohur realitetin lokal në prag të bisedimeve”, ka thënë Valoto gjatë qëndrimit në institucionet lokale.

               Komuna e Vushtrrisë është duke ecur drejtë përmbushjes së standardeve, tha ai duke shtuar se shumë rezultate tashmë i ka arritur dhe se tani është momenti që të konsolidohen ato. Gjatë vizitës së parë në Vushtrri, Komandanti i KFOR-it ka çmuar numrin e madh të të rinjve që ka ky qytet. “Ka shumë të rinjtë në Vushtrri, të rinjtë janë burimi më i rëndësishëm për të ardhmen. Mendoj se Kosova është një vend me aq shumë fat pasi që ka shumë të rinj”, ka vlerësuar gjenerali Valoto. Rreth situatës së sigurisë në Kosovë, Valoto tha se situata është shumë e kënaqshme, KFOR-i është duke pritur mbështetje më të madhe edhe nga popullata lokale. “Është momenti të jemi të bashkuar dhe të dërgojmë mesazhe të qarta dhe pozitive jashtë Kosovës, ngase një imazh i mirë për Kosovën do të ketë reflektime pozitive në investime të huaja dhe rritje ekonomike”, ka thënë Valoto.

               Ndërkaq në enën tjetër kryetari i Komunës Muharrem Shabani ka njoftuar gjeneralin Valoto lidhur me angazhimet e përgjithshme të Komunës si në aspektin e zhvillimit ashtu edhe në procesin politik nëpër të cilin po kalon Kosova. Shabani e njoftoj komandantin e KFOR-it edhe për bashkëpunimin e mirë që ka Komuna e Vushtrrisë me forcat e KFOR-it. Çështjen e zhvillimit ekonomik, Shabani e ka quajtur çështje mjaftë të rëndësishëm për të ardhmen e vendit. Zhvillimi ekonomik lokal do të ndikoi edhe në integrim dhe zhvillim në përgjithësi, ka thënë kreu i Komunës.

               Pas takimit me drejtuesit e Komunës, Valoto i është drejtuar edhe këshilltarëve të Kuvendit Komunal. Në fjalën para këshilltarëve të Kuvendit, përfaqësuesve ti institucioneve ndërkombëtare dhe shoqërisë civile në Vushtrri, Valoto e ka quajtur mjaftë të rëndësishëm momentin nëpër të cilin po kalon Kosova. Kosova po hynë në një moment të veçantë ndoshta historik”, ka thënë Valoto. Në këtë takim në emër të shoqërisë civile ka folur Gëzim Jashari, Shyqyri Quni në emër të komunitetit shkali, Arif Kera në emër të komunitetit turk si dhe Remzije Zekolli në emër të Zyrës për barazi gjinore të Komunës së Vushtrrisë.