Kryeministri Thaqi përuron objektin e ri shkollor në fshatin Nedakovc

Kreu i qeverisë së Kosovës kryeministri Hashim Thaqi, i shoqëruar nga ministri i arsimit Enver Hoxhaj, zëvendësministri Agim Hyseni dhe kryetari i komunës së Vushtrrisë Bajram Mulaku të hënën në ditën e parë të fillimit të vitit të ri shkollor kanë bërë përurimin e objektit të ri shkollor të ndërtuar në fshatin Nedakovc të Vushtrrisë. Ky vit akademik fillon me Kosovën shtet, fillon me objektet e reja shkollore, moderne dhe shumë bashkëkohore,  ka deklaruar kryeministri Thaqi në fshatin Nedakovc ku banorët, mësimdhënësit dhe nxënësit i bënë një pritje madhështore. “Këtë vit shkollor po e fillojmë në shtetin e ri, në objekte të reja shkollore dhe shumë moderne, me paga shumë më të larta për punëtorët e arsimit, por edhe me libra falas për 200 mijë nxënësit e Kosovës”, është shprehur kryeministri në vizitën e tij në Vushtrri. Përveç përurimit të objektit të ri shkollor, kryeministri solemnisht u ka shpërndarë libra falas nxënësve të klasës së parë të kësaj shkolle.Me rastin e përurimit të kësaj shkolle të re në fshatin Nedakovc, kryetari i Komunës Bajram Mulaku ka thënë se përveç shkollës së re në këtë fshat banorët shpejtë do ta kenë edhe rrugën e asfaltuar projekt ky i cili ka filluar të realizohet. Ngritja e kushteve të punës dhe cilësisë në arsim si dhe infrastruktura rrugore janë prioritet i Vushtrrisë është shprehur ai. Ndërsa ministri i arsimit Enver Hoxhaj në këtë përurim tha se prioritet i Kosovës dhe Qeverisë së saj në dy vitet e ardhshme është ngritja e cilësisë në arsim. Sipas drejtorit të arsimit, Qerim Selimi  ndërtimi i kësaj shkolle ka kushtuar rreth 150 mijë €, mjete këto të ministrisë së arsimit.

Postuar më 02.09.2008

Përurohet rruga Vushtrri-Studime e epërme

Ministri i MTTK-së Fatmir Limaj dhe kryetari i Komunës Bajram Mulaku,  bashkë me qytetarë të shumtë dhe drejtues të pushtetit lokal të kanë bërë përurimin e rrugës së asfaltuar Vushtrri-Studime epërme në gjatësi 5.9 kilometra. “Përveç se kemi obligim për njerëzit që punojnë dhe veprojnë në këtë rajon, e kemi një obligim moral dhe njerëzor për këto viktima, që familjarët e tyre të vijnë ti vizitojnë kurdo që dëshirojnë dhe sa më lehtë me qëllim që në mënyrë të dinjiteteshëme të kujdesemi për ata që dhanë më të shtrenjtën e tyre për të gëzuar këtë liri dhe për të ndërtuar vendin tonë”, është shprehur ministri Limaj në fshatin Studime ku banorët e asaj ane i bënë një pritje madhështore. Ministri ka falënderuar kryetarin e Komunës Bajram Mulaku për bashkëpunim dhe për caktimin e këtij prioriteti të cilin e ka vlerësuar mjaftë të rëndësishëm. Ndërkaq kryetari i Komunës Bajram Mulaku ka vlerësuar se me këtë përurim të kësaj rruge institucionet e Kosovës po kryejnë një obligim që kanë ndaj banorëve të asaj ane si dhe në nderim të veprës sublime të të rënëve në këtë fshat. “Është ky një projekt i përbashkët i MTTK-së, Komunës dhe qytetarëve të kësaj ane në përmirësim të kushteve të jetesës këtu”, ka vlerësuar ai.

Ky projekt ka kushtuar 457 mijë €, prej të cilave 367 mijë € i ka ndarë MTTK-ja, 70 mijë € Komuna, 20 mijë € janë ndarë nga qytetarët e fshatit Studime. Po ashtu këtë projekt e ka ndihmuar edhe Shoqata e kreditimit rural “Ardhmëria” e Bashkësisë Lokale Begaj. Gjatësia e kësaj rruge të asfaltuar është 5.9 kilometra ndërkaq gjerësia 5 metra.